WeBible

1 - И начат им в притчах глаголати: виноград насади человек, и огради оплотом, и ископа точило, и созда столп, и предаде его тяжателем, и отиде.

2 - И посла к тяжателем во время раба, да от тяжатель приимет от плода винограда:

3 - они же емше его биша и отослаша тща.

4 - И паки посла к ним другаго раба: и того камением бивше, пробиша главу ему и послаша безчестна.

5 - И паки иного посла: и того убиша: и многи ины, овы убо биюще, овы же убивающе.

6 - Еще убо единаго сына име возлюбленнаго своего, посла и того к ним последи, глаголя, яко усрамятся сына моего.

7 - Они же тяжателе реша к себе, яко сей есть наследник: приидите, убием его, и наше будет наследствие.

8 - И емше его убиша и извергоша его вон из винограда.

9 - Что убо сотворит господь винограда? Приидет и погубит тяжатели и даст виноград инем.

10 - Ни Писания ли сего чли есте: камень, егоже не в ряду сотвориша зиждущии, сей бысть во главу угла:

11 - от Господа бысть сие, и есть дивно во очию нашею?

12 - И искаху Его яти, и убояшася народа: разумеша бо, яко к ним притчу рече: и оставльше Его отидоша.

13 - И послаша к Нему некия от фарисей и иродиан, да Его обольстят словом.

14 - Они же пришедше глаголаша Ему: Учителю, вемы, яко истинен еси и не радиши ни о комже: не зриши бо на лице человеков, но воистинну пути Божию учиши: достоит ли кинсон кесареви дати, или ни? Дамы ли, или не дамы?

15 - Он же ведый их лицемерие, рече им: что Мя искушаете? Принесите Ми пенязь, да вижу.

16 - Они же принесоша. И глагола им: чий образ сий и написание? Они же реша Ему: кесарев.

17 - И отвещав Иисус рече им: воздадите кесарева кесареви и Божия Богови. И чудишася о Нем.

18 - И приидоша саддукее к Нему, иже глаголют воскресению не быти: и вопросиша Его, глаголюще:

19 - Учителю, Моисей написа нам, яко аще кому брат умрет и оставит жену, а чад не оставит: да поймет брат его жену его и воскресит семя брату своему.

20 - Седмь братий бе: и первый поят жену и умирая не остави семене:

21 - и вторый поят ю и умре, и ни той остави семене: и третий такожде:

22 - и пояша ю седмь и не оставиша семене: последи же всех умре и жена.

23 - В воскресение убо, егда воскреснут, которому их будет жена: седмь бо имеша ю жену.

24 - И отвещав Иисус рече им: не сего ли ради прельщаетеся, не ведуще Писания, ни силы Божия?

25 - Егда бо из мертвых воскреснут, ни женятся, ни посягают, но суть яко Ангели на небесех:

26 - о мертвых же, яко востают, несте ли чли в книгах Моисеовых, при купине яко рече ему Бог, глаголя: Аз Бог Авраамов и Бог Исааков и Бог Иаковль?

27 - Несть Бог мертвых, но Бог живых: вы убо много прельщаетеся.

28 - И приступль един от книжник, слышав их стязающихся и видев, яко добре отвеща им, вопроси Его: кая есть первая всех заповедий?

29 - Иисус же отвеща ему: яко первейши всех заповедий: слыши, Израилю, Господь Бог ваш Господь един есть:

30 - и возлюбиши Господа Бога твоего всем сердцем твоим, и всею душею твоею, и всем умом твоим, и всею крепостию твоею: сия есть первая заповедь.

31 - И вторая подобна ей: возлюбиши ближняго своего яко сам себе. Болшая сею ина заповедь несть.

32 - И рече Ему книжник: добре, Учителю, воистинну рекл еси, яко един есть Бог, и несть ин разве Его:

33 - и еже любити Его всем сердцем, и всем разумом, и всею душею, и всею крепостию: и еже любити ближняго яко себе, боле есть всех всесожжений и жертв.

34 - Иисус же видев, яко смысленно отвеща, рече ему: не далече еси от Царствия Божия. И никтоже смеяше ктому Его вопросити.

35 - И отвещав Иисус глаголаше, учя в церкви: како глаголют книжницы, яко Христос Сын есть Давидов?

36 - Той бо Давид рече Духом Святым: глагола Господь Господеви моему: седи о десную Мене, дондеже положу враги Твоя подножие ногама Твоима.

37 - Сам убо Давид глаголет Его Господа: и откуду Сын ему есть? И мног народ послушаше Его в сладость.

38 - И глаголаше им во учении Своем: блюдитеся от книжник, хотящих во одеяниих ходити, и целования на торжищих,

39 - и преждеседания на сонмищих, и первовозлежания на вечерях:

40 - поядающе домы вдовиц и непщеванием надолзе молящеся, сии приимут лишшее осуждение.

41 - И сед Иисус прямо сокровищному хранилищу, зряше, како народ мещет медь в сокровищное хранилище. И мнози богатии вметаху многа.

42 - И пришедши едина вдовица убога, вверже лепте две, еже есть кодрант.

43 - И призвав ученики Своя, рече им: аминь глаголю вам, яко вдовица сия убогая множае всех вверже вметающих в сокровищное хранилище:

44 - вси бо от избытка своего ввергоша: сия же от лишения своего вся, елика имеяше, вверже, все житие свое.