WeBible

1 - И рече Господь к Моисею, глаголя:

2 - заповеждь сыном Израилевым, и речеши к ним, глаголя: дары Моя, даяния Моя, приносы Моя, в воню благовония соблюдите приносити Мне на праздники Моя.

3 - И да речеши к ним: сия приношения, яже принесете Господу, агнцев единолетных непорочных два на день во всесожжение выну:

4 - агнца единаго сотворите рано, и агнца втораго сотворите в вечер:

5 - и да сотвориши десятую часть ефи (меры) муки пшеничны на жертву, вмешану в елеи четвертую часть (меры) ина:

6 - всесожжение непрестанное, якоже бысть в горе Синайстей, в воню благовония Господу.

7 - И возлияние его четвертую часть (меры) ина агнцу единому: во святем да возлиеши возлияние сикеру Господу:

8 - и агнца втораго сотвориши к вечеру: по жертве его и по возлиянию его да сотвориши, в воню благовония Господу.

9 - И в день суббот приведете два агнца единолетна непорочна и две десятины муки пшеничны вмешаны в елеи на жертву и возлияние,

10 - всесожжения субботы в субботах, на всесожжение всегдашнее и возлияние его.

11 - И в новомесячиих да принесете во всесожжение Господу телца два от говяд и овна единаго, агнцев единолетных седмь непорочных:

12 - три десятины муки пшеничны вмешаны в елеи телцу единому, и две десятины муки пшеничны вмешаны в елеи овну единому,

13 - по десятине муки пшеничны вмешаны в елеи агнцу единому: жертву в воню благовония принос Господу.

14 - Возлияние их от вина пол (меры) ина да будет телцу единому: и третия часть (меры) ина да будет овну единому: и четвертая часть (меры) ина да будет агнцу единому: сие всесожжение от месяца до месяца в месяцы лета.

15 - И козла единаго от коз греха ради Господу на всесожжение присное сотворите и возлияние его.

16 - И в месяце первем в четвертыйнадесять день месяца Пасха Господу:

17 - и в пятыйнадесять день месяца сего праздник: седмь дний опресноки да ясте.

18 - И день первый нарочит свят да будет вам: всякаго дела служебна да не сотворите.

19 - И принесете всесожжения принос Господу, телца от волов два, овна единаго, агнцев единолетных седмь: непорочни будут вам.

20 - И жертва их мука пшенична вмешана в елеи: три десятины телцу единому и две десятины овну единому да сотворите:

21 - по десятине сотвориши агнцу единому, седми агнцем:

22 - и козла единаго от коз греха ради, во еже умолити о вас.

23 - Кроме всесожжения всегдашняго утренняго, еже есть всесожжение всегдашнее, сотворите сия.

24 - По сему сотворите на (всяк) день, в седмь дний, дар, принос в воню благовония Господу: на всесожжение всегдашнее сотвориши возлияние его.

25 - И день седмый нарочит свят да будет вам: всякаго дела служебнаго да не сотворите в онь.

26 - И день новых (плодов), егда принесете Господеви жертву нову седмиц, нарочит свят будет вам: всякаго дела служебна да не сотворите.

27 - И да принесете всесожжения в воню благовония Господу, телца от волов два, овна единаго, агнцев единолетных седмь непорочных.

28 - Жертва их мука пшенична вмешана в елеи: три десятины телцу единому и две десятины овну единому:

29 - по десятине агнцу единому, седми агнцем:

30 - и козла единаго от коз греха ради, во еже умолити о вас.

31 - Кроме всесожжения всегдашняго, и жертву их сотворите Мне, непорочни да будут вам, и возлияния их.