WeBible

1 - И призва Товит Товию сына своего и рече ему: промысли, чадо мзду человеку ходившему с тобою: и приложити ему подобает.

2 - И рече: отче, не буду обижден дав ему пол, яже принесох,

3 - понеже приведе мя тебе здрава и жену мою изцели, и сребро мое принесе, и тебе такожде уврачева.

4 - И рече старец: праведно есть ему.

5 - И призва Ангела и рече ему: возми пол всех, яже принесосте, и пойди здрав.

6 - Тогда призвав обоих тайно, рече има: благословите Бога и Тому исповедайтеся, и величие дадите Ему, и исповедайтеся Ему пред всеми живущими о сих, яже сотвори с вама: добро еже благословити Бога и возносити имя Его, словеса дел Божиих благочестно сказующе: и да не ленитеся исповедатися Ему:

7 - тайну цареву добро хранити, дела же Божия открывати славно: добро творите, и зло не обрящет вы:

8 - благо молитва с постом и милостынею и правдою: благо малое с правдою, нежели много с неправдою: добро творити милостыню, нежели сокровиществовати злато,

9 - милостыня бо от смерти избавляет и тая очищает всяк грех: творящии милостыни и правды исполнятся жизни,

10 - согрешающии же врази суть своего живота:

11 - не утаю от вас всякаго словесе, рех бо: тайну цареву хранити добро, дела же Божия открывати славно:

12 - и ныне, егда молился еси ты и невестка твоя Сарра, аз приношах память молитвы вашея пред Святаго, и егда погребал еси мертвыя, подобне присутствовах тебе,

13 - и егда не ленился еси востати и оставити обед твой, да отшед покрыеши мертваго, не утаился еси мене благотворяй, но с тобою бех:

14 - и ныне посла мя Бог изцелити тя и невестку твою Сарру:

15 - аз есмь Рафаил, един от седми святых Ангелов, иже приносят молитвы святых и входят пред славу Святаго.

16 - И смятостася оба и падоста на лице, зане убоястася.

17 - И рече има: не бойтеся, яко мир вама будет, Бога же благословите во век:

18 - яко не своею си благодатию, но волею Бога нашего приидох, сего ради благословите Его во век:

19 - вся дни являхся вама, и не ядох, ниже пих, но видение вы зрясте:

20 - и ныне исповедайтеся Богу, зане восхожду к Пославшему мя, и напишите вся, яже совершишася, в книгу.

21 - И востаста и не ктому видеста его:

22 - и исповедаста дела велия и чудная Божия, и како явися има Ангел Господень.