WeBible

1 - In tribus placitum est spiritui meo, quæ sunt probata coram Deo et hominibus :

2 - concordia fratrum, et amor proximorum, et vir et mulier bene sibi consentientes.

3 - Tres species odivit anima mea, et aggravor valde animæ illorum :

4 - pauperem superbum, divitem mendacem, senem fatuum et insensatum.

5 - Quæ in juventute tua non congregasti, quomodo in senectute tua invenies ?

6 - Quam speciosum canitiei judicium, et presbyteris cognoscere consilium !

7 - Quam speciosa veteranis sapientia, et gloriosus intellectus et consilium !

8 - Corona senum multa peritia, et gloria illorum timor Dei.

9 - Novem insuspicabilia cordis magnificavi : et decimum dicam in lingua hominibus :

10 - homo qui jucundatur in filiis, vivens et videns subversionem inimicorum suorum.

11 - Beatus qui habitat cum muliere sensata, et qui lingua sua non est lapsus, et qui non servivit indignis se.

12 - Beatus qui invenit amicum verum, et qui enarrat justitiam auri audienti.

13 - Quam magnus qui invenit sapientiam et scientiam ! sed non est super timentem Dominum.

14 - Timor Dei super omnia se superposuit.

15 - Beatus homo cui donatum est habere timorem Dei : qui tenet illum, cui assimilabitur ?

16 - Timor Dei initium dilectionis ejus : fidei autem initium agglutinandum est ei.

17 - Omnis plaga tristitia cordis est, et omnis malitia nequitia mulieris.

18 - Et omnem plagam, et non plagam videbit cordis :

19 - et omnem nequitiam, et non nequitiam mulieris :

20 - et omnem obductum, et non obductum odientium :

21 - et omnem vindictam, et non vindictam inimicorum.

22 - Non est caput nequius super caput colubri,

23 - et non est ira super iram mulieris. Commorari leoni et draconi placebit, quam habitare cum muliere nequam.

24 - Nequitia mulieris immutat faciem ejus : et obcæcat vultum suum tamquam ursus, et quasi saccum ostendit. In medio proximorum ejus

25 - ingemuit vir ejus, et audiens suspiravit modicum.

26 - Brevis omnis malitia super malitiam mulieris : sors peccatorum cadat super illam.

27 - Sicut ascensus arenosus in pedibus veterani, sic mulier linguata homini quieto.

28 - Ne respicias in mulieris speciem, et non concupiscas mulierem in specie.

29 - Mulieris ira, et irreverentia, et confusio magna.

30 - Mulier si primatum habeat, contraria est viro suo.

31 - Cor humile, et facies tristis, et plaga cordis, mulier nequam.

32 - Manus debiles et genua dissoluta, mulier quæ non beatificat virum suum.

33 - A muliere initium factum est peccati, et per illam omnes morimur.

34 - Non des aquæ tuæ exitum, nec modicum : nec mulieri nequam veniam prodeundi.

35 - Si non ambulaverit ad manum tuam, confundet te in conspectu inimicorum.

36 - A carnibus tuis abscinde illam, ne semper te abutatur.