WeBible

1 - Qui diligit filium suum assiduat illi flagella, ut lætetur in novissimo suo, et non palpet proximorum ostia.

2 - Qui docet filium suum laudabitur in illo, et in medio domesticorum in illo gloriabitur.

3 - Qui docet filium suum in zelum mittit inimicum, et in medio amicorum gloriabitur in illo.

4 - Mortuus est pater ejus, et quasi non est mortuus : similem enim reliquit sibi post se.

5 - In vita sua vidit, et lætatus est in illo : in obitu suo non est contristatus, nec confusus est coram inimicis :

6 - reliquit enim defensorem domus contra inimicos, et amicis reddentem gratiam.

7 - Pro animabus filiorum colligabit vulnera sua, et super omnem vocem turbabuntur viscera ejus.

8 - Equus indomitus evadit durus, et filius remissus evadet præceps.

9 - Lacta filium, et paventem te faciet : lude cum eo, et contristabit te.

10 - Non corrideas illi, ne doleas, et in novissimo obstupescent dentes tui.

11 - Non des illi potestatem in juventute, et ne despicias cogitatus illius.

12 - Curva cervicem ejus in juventute, et tunde latera ejus dum infans est, ne forte induret, et non credat tibi, et erit tibi dolor animæ.

13 - Doce filium tuum, et operare in illo, ne in turpitudinem illius offendas.

14 - Melior est pauper sanus, et fortis viribus, quam dives imbecillis et flagellatus malitia.

15 - Salus animæ in sanctitate justitiæ melior est omni auro et argento : et corpus validum quam census immensus.

16 - Non est census super censum salutis corporis, et non est oblectamentum super cordis gaudium.

17 - Melior est mors quam vita amara, et requies æterna quam languor perseverans.

18 - Bona abscondita in ore clauso, quasi appositiones epularum circumpositæ sepulchro.

19 - Quid proderit libatio idolo ? nec enim manducabit, nec odorabit.

20 - Sic qui effugatur a Domino, portans mercedes iniquitatis :

21 - videns oculis et ingemiscens, sicut spado complectens virginem, et suspirans.

22 - Tristitiam non des animæ tuæ, et non affligas temetipsum in consilio tuo.

23 - Jucunditas cordis, hæc est vita hominis, et thesaurus sine defectione sanctitatis : et exsultatio viri est longævitas.

24 - Miserere animæ tuæ placens Deo, et contine : congrega cor tuum in sanctitate ejus, et tristitiam longe repelle a te.

25 - Multos enim occidit tristitia, et non est utilitas in illa.

26 - Zelus et iracundia minuunt dies, et ante tempus senectam adducet cogitatus.

27 - Splendidum cor et bonum in epulis est : epulæ enim illius diligenter fiunt.