Filiis Core. Psalmus cantici. Fundamenta ejus in montibus sanctis ;

diligit Dominus portas Sion super omnia tabernacula Jacob.

Gloriosa dicta sunt de te, civitas Dei !

Memor ero Rahab et Babylonis, scientium me ; ecce alienigenæ, et Tyrus, et populus Æthiopum, hi fuerunt illic.

Numquid Sion dicet : Homo et homo natus est in ea, et ipse fundavit eam Altissimus ?

Dominus narrabit in scripturis populorum et principum, horum qui fuerunt in ea.

Sicut lætantium omnium habitatio est in te.