Бысть же во Иконии, вкупе внити има в сонмище Иудейское и глаголати тако, яко веровати Иудеев и Еллинов множеству многу.

Неверующии же Иудее воздвигоша и озлобиша душы языков на братию.

Доволно же убо время пребыста дерзающа о Господе, Свидетелствующем слову благодати Своея и дающем знамения и чудеса быти рукама их.

Разделишажеся множество града, и ови убо бяху со Иудеи, ови же со Апостолы.

И егда бысть стремление языком же и Иудеем с началники их досадити и камением побити их,

уведевша же прибегоста во грады Ликаонския, в Листру и Дервию, и во окрестныя их,

и тамо беста благовествующа.

И некто муж в Листрех немощен ногама седяше, хром от чрева матере своея сый, иже николиже бе ходил.

Сей слышаше Павла глаголюща: иже воззрев нань и видев, яко веру имать здрав быти,

рече велиим гласом: тебе глаголю во имя Господа Иисуса Христа, встани на ногу твоею прав. И абие возскочи и хождаше.

Народи же видевше, еже сотвори Павел, воздвигоша глас свой, ликаонски глаголюще: бози уподобльшеся человеком снидоша к нам.

Нарицаху же убо Варнаву Диа, Павла же Ермиа, понеже той бяше началник слова.

Жрец же Диев, сущаго пред градом их, приведе юнцы и (принесе) венцы пред врата, с народы хотяше жрети.

Слышавша же Апостола Варнава и Павел, растерзавша ризы своя, вскочиста в народ, зовуща и глаголюща:

мужие, что сия творите? И мы подобострастна есма вам человека, благовествующа вам от сих суетных обращатися к Богу Живу, Иже сотвори небо и землю и море и вся, яже в них:

Иже в мимошедшыя роды оставил бе вся языки ходити в путех их:

и убо не несвидетелствована Себе остави, благотворя, с небесе нам дожди дая и времена плодоносна, исполняя пищею и веселием сердца наша.

И сия глаголюща, едва устависта народы не жрети има, но отити коемуждо во своя си. Пребывающема же има и учащема,

приидоша от Антиохии и Иконии нецыи Иудее, и стязающемася има с дерзновением, наустиша народы отступити от нею, глаголюще, яко ничтоже истинно глаголета, но все лжета. И наустивше народы и камением побивше Павла, извлекоша вне града, мняще его умерша.

Окрест же ставшым его учеником, востав вниде во град и наутрие изыде с Варнавою в Дервию.

Благовествовавша же граду тому и научивша многи, возвратистася в Листру и Иконию и Антиохию,

утверждающа душы учеников, моляща пребыти в вере, и яко многими скорбьми подобает нам внити в Царствие Божие.

Рукоположша же им пресвитеры на вся церкви и помолившася с постом, предаста их Господеви, в Негоже увероваша.

И прошедша Писидию, приидоста в Памфилию:

и глаголавша в Пергии слово Господне, снидоста во Атталию

и оттуду отплыста во Антиохию, отнюдуже беста предана благодати Божией в дело, еже скончаста.

Пришедша же и собравша церковь, сказаста, елика сотвори Бог с нима и яко отверзе языком дверь веры:

пребыста же тамо время не мало со ученики.