Восхвалим убо мужы славны и отцы нашя в бытии.

Многу славу созда Господь в них величием Своим от века.

Господствующе во царствиих своих и мужие именити силою, советующе разумом своим, провещавшии во пророчествах,

старейшины людий в советех и в разуме писания людий:

премудрая словеса в наказании их, ищуще гласа мусикийска и поведающе повести во писаниих:

мужие богатии, обдаровани крепостию, мирно живуще в жилищих своих.

Вси сии в родех прославлени быша, и во днех их похвала.

Суть от них, иже оставиша имя, еже поведати хвалы: и суть, ихже несть памяти, и погибоша яко не сущии, и быша яко не бывше, и чада их по них.

Но сии мужие милостивии, ихже правды не забвены быша:

с семенем их пребудет доброе наследие, изчадия их в заветех:

остася семя их, и чада их по них:

до века пребудет семя их, и слава их не потребится:

телеса их в мире погребена быша, а имена их живут в роды.

Премудрость их поведят людие, и похвалу их исповесть церковь.

Енох угоди Господеви и преложися, образ покаяния родом.

Ное обретеся совершен, праведен, во время гнева бысть примирение:

сего ради бысть останок земли, егда бяше потоп.

Заветы вечнии положени быша с ним, да не потребится потопом всяка плоть.

Авраам великий отец множеству языков, и не обретеся подобный во славе его:

иже соблюде закон Вышняго и бысть в завете с Ним:

и на плоти его устави завет и во искушении обретеся верен:

сего ради клятвою постави с ним благословитися языком о семени его,

умножити его яко персть земли, и яко звезды возвысити семя его, и наследити им от моря до моря и от реки до края земли.

И о Исааце утверди сице Авраама ради Отца его благословение всех человеков и завет:

и почи на главе Иаковли.

Позна его благословении Своими и даде его в наследие, и раздели части его на колен дванадесять,

и изведе от него мужа милости, обретшаго благодать пред очесы всякия плоти.