Y sinando diando, dicó os balbales sos bucharaban desquerias ofrendas andré a jestari e manchin.

Y dicó tambien yeque piuli chorori, sos chibelaba dui cales chinores.

Y penó: Aromali sangue penelo, que ocona chorori piuli ha chibado butér que sares os avéres.

Presas sares ocolas terelan bucharado somía ofrendas de Debél, de ma les sobresarela: Tami ocona de desqueri erdicha terela chibado saro o jayere sos terelaba.

Y rudeló á yeques, sos penaban de la cangri, que sinaba chiti de barias pacuarias, y de diñipenes:

Oconas buchias sos diquelais, abillarán chibeses, pur na sinará mequelada bar opré bar, sos na sinará demolida.

Y le puchabáron, y penáron: ¿Duquendio, pur sinará ocono? y que simache sinará, pur ocono comenzáre á sinar?

O penó: Diquelad, que na sineleis jongabados: presas baribustres abillarán andré minrio nao, penando: Menda sinelo, y o chiros sinela sunparal: garabelaos pues de chalar palal de junos.

Y pur junelareis chingaripenes y jestias, sangue na cangueleis: presas jomte que ocono anaquele brotoboro, tami na sinará yescotria a anda.

Entonces les penaba: Se ardiñará sueti contra sueti, y chim contra chim.

Y sinará bares jolili-motos por os gaues, y salipénes, y boquises y sinará buchias espantosas, y barias simaches e Charos.

Tami anglal de saro ocono sangue ustilarán, y plastañarán, entregisarando sangue á as Synagogas, y á os estaripeles, y lliguerarán sangue á os Crallises, y á os Poresqueres, por minrio nao:

Y ocono sinará sasta machiria á sangue.

Terelad yeque buchi silni andré jires carlés, o na penchabar anglal ma terelais de rudelar.

Presas menda diñaré sangue mui y chaneleria, al que n’astisarelarán resistir, ni contrapenar sares jires daschmanuces:

Y sinareis entregados de jires batuces, y plalores, y rati, y monrés, y querelarán merar a yéques de sangue.

Y sares aborrecerán á sangue pre minrio nao.

Tami na se najabará yeque bal de jires jerés.

Sat jiri paciencia listrabareis jirias ochias.

Pues pur dicáreis á Jerusalém pandada al crugos de jundunares, entonces chanelad que sun najipen sinela sunparal.

Entonces junos sos sinelan andré la Judéa, najalelen á os bures: y junos en medio de siró se sicobelen abrí; y junos andré os bures na chalen andré de siró.

Presas oconas sinelan chibeses de venganza, somia se perelalen sarias as buchias, sos sinelan libanadas.

Tami ysna de las cambrias, y de ocolas sos diñelan de mamisarar andré ocolas chibeses!  Presas sinará bari apretura opré a pu, y ira para ocona sueti.

Y perarán á filo e estuche: y sinarán lliguerados utildes á sares os chimes, y Jerusalém sinará hollada de los Busnés: disde que se perele o chiros es Busnes.

Y terelará simáches Cam, y andré a Chimutra, y andré as cherdillas; y andré la pu tráqui es manuces pre a confusion sos querelara a chumas e moros, y de sus panias.

Sinando os manuces yertos por o dal y canguelo es buchias, sos opre abillaran á sari a sueti: presas as silas e Tarpe sinarán conmovidas:

Entonces diquelarán al Chaboro e manu abíllar opré yeque paros sat ezor baro y chimusolano.

Pur comenzaren pues á perelarse oconas buchias, diquelad, y ardiñelad jires jeres; presas sunparal sinela jire mestepé.

Y les penó yeque semejanza: Diquelad a carschta-heila, y sarias as carschtas.

Pur bucharelan ya abrí de sí o mibao, jabillais que sunparal sinela o canriano.

Andiar tambien sangue, pur dicalareis querelarse oconas buchias, chanelad que sunparal sinela o chim de Debél.

Aromali sangue penelo, que na nacará ocona generacion, disde que sarias oconas buchias sinarán quereladas.

O Charos y la pu nacabarán: tami minrias vardas na nacarán.

Diquelad pues por sangue, na sinele que jires carlés se carguisarelen de glotoneria y de matipen, y de las gramias de ocona chipen: y que abillele de repente opré sangue ocola chibes.

Presas andiar sasta yeque maluno abillará opré sares sos sinelan opré a chichi de sari a jolili.

Pues sinelad de vela manguelando á Un-debél andré saro chiros, somia que sineleis cabalicos de najar sarias oconas buchias, sos jomte sinar, y de sinar andre pindré, anglal e Chaboro e manu.

Y sinaba bedando andré a cangri: ta arachis chalaba abrí, y lo nacaba andré o bur, araquerado e Urucal.

Y sari a sueti se ardiñeló de clarico, somia abillar, a junarle andré a cangri.