Отвещав же Елифаз Феманитин, рече:

не Господь ли есть научаяй разуму и хитрости?

Ибо кое попечение Господу, аще ты был еси делы непорочен? Или (кая) польза, яко прост творити будеши путь твой?

Или опасение имея от тебе обличит тя и внидет с тобою в суд?

Еда злоба твоя есть не многа? Безчисленнии же твои суть греси?

В залог бо имал еси от братии твоея вотще, одежду же нагих отнимал еси,

ниже водою жаждущих напоил еси, но алчущих лишил еси хлеба:

удивлялся же еси неких лицу и повергал еси убогих на земли:

вдовицы же отпустил еси тщы и сироты озлобил еси.

Сего ради обыдоша тя сети, и поспеши на тя рать велика:

свет тебе тма бысть, уснувшаго же вода тя покры.

Еда на высоких живый не призирает? Укоризною же возносящихся смири.

И рекл еси: что разуме Крепкий? Или во мраце разсудит?

Облак покров Его, и неувидимь будет, и круг небесе обходит.

Еда стезю древнюю сохраниши, в нюже ходиша мужие неправедни,

иже яти быша прежде времене? Река текущая основания их,

глаголющии: что сотворит нам Господь? Или что нанесет на ны Вседержитель?

Иже исполнил есть домы их благими: совет же нечестивых далече от Него.

Видевше праведницы возсмеяшася, непорочен же глумляшеся им:

не погибе ли имение их, и останки их пояст огнь?

Буди убо тверд, аще претерпиши, потом плод твой будет во благих.

Приими же из уст Его изречение и восприими словеса Его в сердце твое.

Аще же обратишися и смириши себе пред Господем, и далече сотвориши от жилища твоего неправду,

и положен будеши на персти в камени, и якоже камень потока Офирска.

Будет убо тебе Вседержитель помощник от враг, чиста же сотворит тя якоже сребро разжжено,

потом дерзновение возимееши пред Богом, воззрев весело на небо.

Помольшуся же тебе к Нему, услышит тя, даст же ти обеты твоя воздати,

устроит же ти жилище правды, на путех же твоих будет свет:

яко смирил еси себе, тогда речеши: вознесеся, и поникша очима спасет,

избавит неповиннаго, и спасешися чистыма рукама твоима.